Bandaríski geimfarinn Bill Oefelein greindi lögreglu frá því við yfirheyrslur vegna handtöku fyrrum ástkonu hans Lisu Nowak í febrúar að hann hafi ekki lesið ástarbréf sem ný kærasta hans Colleen Shipman sendi honum í tölvupósti á meðan á geimferð hans með geimferjunni Discovery stóð í desember. Hann hafi fyrst lesið bréfin eftir að hann kom aftur til jarðar en í bréfunum lýsir Shipman því m.a. hvernig hún ætli að taka á móti honum við heimkomuna. Þetta kemur fram á fréttavef CNN.

Samkvæmt upplýsingum bandarísku geimvísindastofnunarinnar NASA láta geimfarar stofnuninni í té lista yfir þá aðila sem þeir vilja fá tölvuskeyti frá á meðan á geimferðum þeirra stendur. Umrædd tölvuskeyti eru hvorki opnuð né ritskoðuð af stofnuninni en ástir og samskipti geimfara hafa vakið áhuga fólks víða um heim eftir að Nowak var handtekin fyrir að ráðast á Shipman.

Michael Griffin, yfirmaður geimvísindastofnunarinnar NASA, greindi fjármálanefnd bandaríska þingsins frá því í síðustu viku að stofnunin hafi ekki vitað af því að Nowak ætti við alvarleg vandamál að stríða. „Hún var greinilega í miklum vanda og okkur mistókst greinilega sem stofnun að koma auga á að hún ætti við vandamál að stríða,” sagði hann.

Nowak fór út í geiminn með geimferjunni Discovery síðastliðið sumar og var heiðruð fyrir viðgerð á ferjunni á meðan á ferðinni stóð. Þá hafði staðið til að hún færi með geimferjunni Atlantis til Alþjóðlegu geimstöðvarinnar á næstu vikum. Eftir að hún var handtekin var hún hins vegar tímabundið leyst undan skyldum sínum hjá NASA.