Fyrrum starfsmenn Alþjóðabankans krefjast afsagnar Wolfowitz

Rúmlega 40 fyrrum hátt settir starfsmenn Alþjóðabankans hafa sent dagblaðinu Financial Times bréf þar sem hvatt er til þess að Paul Wolfowitz, forstjóri bankans, segi af sér án tafar. Segir í bréfinu að Wolfowitz hafi glatað trausti starfsmanna bankans á öllum stigum og að hann geti ekki lengur starfað fyrir bankann sem skilvirkur leiðtogi.

Wolfowitz er sagður hafa glatað trausti og virðingu starfsfólks og valdið deilum meðal stjórnenda. Þá segir í bréfinu að samskipti hans við stjórn bankans séu stirð og að hans eigið mannorð hafi beðið hnekki. Segir í niðurlagi bréfsins að það eina sem Wolfowitz geti nú gert fyrir bankann, sé að segja af sér.

Kröfur hafa komið fram um að Wolfowitz segi af sér embætti eftir að í ljós kom, að náin vinkona hans, sem starfaði hjá Alþjóðabankanum þegar hann kom þangað til starfa árið 2005, fékk háa launahækkun í kjölfar þess að hún var send til að vinna að tímabundnum verkefnum hjá bandaríska utanríkisráðuneytinu.

• 1 blogg um fréttina

Bloggað um fréttina

• Jóhannes Ragnarsson: Wolfowitz í Sjálfstæðisflokkinn á Suðurlandi.