Rússar hóta aðgerðum vegna styttu

Forseti rússneska þingsins hvatti í morgun til þess að stjórnmálasambandi yrði slitið við Eista í hefndarskyni fyrir að sóvéskt stríðsminnismerki var fjarlægt úr miðborg Tallinn í nótt. Kosið verður um tillöguna síðar í dag, en hún er þó ekki bindandi þótt hún verði samþykkt.

Miklar óeirðir urðu í Tallinn eftir að undirbúningur hófst að flutningi styttunnar, og var ákveðið að flytja hana þegar í stað. Styttan var reist árið 1947 og er af sóvéskum hermanni. Eistum þykir mörgum hún minna á áratuga yfirráð Sóvétmanna yfir landinu en Rússar og Eistar af rússneskum uppruna segja styttuna vera minnisvarða um þá sem létu lífið í baráttunni við nasismann í síðari heimsstyrjöldinni.

Talsmaður rússneska utanríkisráðuneytisins, Mikhaíl Kamynin, kallaði aðgerðir eistnesku stjórnarinnar ómennskar og að Rússar muni endurskoða samskipti sín við Eista í kjölfarið.

• 2 blogg um fréttina

Bloggað um fréttina

• Brynjar Hólm Bjarnason: Hóta slitum við Eista
• Guðjón Sigþór Jensson: Eðlileg viðbrögð