Leit stendur enn yfir að hinni þriggja ára gömlu Madeleine McCann sem var numin á brott úr herbergi sínu þar sem hún svaf með tvegga ára tvíburasystkinum sínum. Foreldrar hennar sögðu í dag ekki hafa misst vonina og eru vongóð um að hún finnist á lífi segir í yfirlýsingu sem þau sendu út í dag.

Þar þakka þau líka almenningi fyrir hjálp við leitina og stuðning sem þau hafa fengið. „Núna beinum við öllum okkar tilfinningum og krafti í að tryggja örugga heimkomu Madeleine" segir ennfremur í yfirlýsingunni sem birt var á netinu.

Leit að litlu stúlkunni hefur verið útvíkkuð enn frekar og sendi breska sendiráðið á Íslandi nú rétt í þessu yfirlýsingu að beiðni portúgalskra yfirvalda til að afla einhverra upplýsinga, þar á meðal hjá ferðalöngum sem hafa dvalist síðustu daga á Algarve í Portúgal.

Tveir sérfræðingar í hegðun kynferðisglæpamanna hafa nú bæst í hóp rannsóknarlögreglumanna í Portúgal sem vinna að leitinni að Madeleine. Þeir koma frá samtökum sem vinna gegn kynferðismisnotkun á börnum í Bretlandi.

Ástæða þess að þeir voru kallaðir til við rannsókn málsins er sú að portúgalska rannsóknarlögreglan fékk upplýsingar um breska barnaníðinga með tengsl við Algarve.

Samkvæmt Sky fréttastofunni hefur portúgalska lögreglan fundið barnaklæðnað en neitar að gefa upp hvort það sé af Madeleine eða ekki. Lögreglan í Portúgal hefur verið gagnrýnd harðlega í breskum fjölmiðlum fyrir vinnubrögðin í rannsókn málsins. Hún hefur verið afar varfærin í hverskyns upplýsingum um málið enda eru upplýsingalög um framgang sakamála strangari þar í landi en í Bretlandi. Sendiherra Bretlands í Portúgal hefur þó tekið uppp hanskann fyrir lögregluyfirvöld þar og segist hafa fengið upplýsingar um að leit að stúlkunni hafi verið fagmannlega unnin.

Knattspyrnuhetjur frá Portúgal, Cristiano Ronaldo og Paulo Ferreira, hafa sent frá sér myndbandsupptökur þar sem þeir hvetja alla sem geta veitt upplýsingar um hvarf Madeleine til að gefa sig fram til lögreglu.