Skilnaðartíðni í Danmörku hefur ekki verið eins lág síðan árið 1999 og eru nú 6,3% færri hjón sem grípa til skilnaðar á þessu ári miðað við í fyrra. Svo virðist sem hjónabandið sé í tísku þar í landi því fleiri Danir gifta sig en fyrr. Þetta er þvert á þróunina hér á landi en skilnuðum hefur fjölgar frá árinu 1999.

Af hverjum eitt þúsund pörum sem gifta sig í Danmörku, skilja 13,3% en í fyrra gripu 14,2% til skilnaðar og er þetta annað árið í röð sem tíðni skilnaða minnkar í landinu. Þetta er niðurstöður rannsóknar sem stofnun félagsfræðirannsókna í Danmörku sendi frá sér.Þar kemur líka í ljós að tveir þriðju hjónabanda sem enda með skilnaði eru hjónabönd sem hafa enst í minna en sex ár en hlutfall skilnaða í þeim flokki hefur samt minnkað.

Meiri áhersla á hjónabandið og fjölskyldulíf en áður

Sérfræðingar stofnunarinnar segja að helstu skýringarnar séu meðal annars þær að ungt fólk í dag sé sjálft afsprengi skilnaða og vilji ekki endurtaka leikinn. Sérfræðingar segja líka að það sé liðin tíð að fólk einblíni eingöngu á starfsframann á kostnað fjölskyldunnar. Sömuleiðis er það ekki eins mikil skömm og áður að fara til hjónabandsráðgjafa. Einnig spili meira jafnræði milli kynjanna máli að sögn sérfræðinga sem Berlingske tidende talar við í dag.

Á vef Hagstofu Íslands er hægt að sjá giftingar og skilnaðartíðni Íslendinga síðan árið 1951 og þar má sjá að á árunum 2001 - 2005 enduðu 39% hjónabanda með skilnaði en á árunum 1996-2000 skildu 37% hjóna.