Bandaríska blaðið Washington Post fullyrðir í dag að framkvæmdastjórn Alþjóðabankans hafi komist að þeirri niðurstöðu, að Paul Wolfowitz, forstjóri bankans hafi brotið siðareglur þegar hann kom því í kring að unnusta hans, sem starfaði hjá bankanum, fékk launahækkun. Mun stjórnin reyna að koma Wolfowitz frá í næstu viku.

Blaðið hefur eftir ónafngreindum háttsettum embættismönnum bankans, að stjórnarmenn vilji ekki þurfa að greiða atkvæði um að reka Wolfowitz því það gæti valdið erfiðleikum í samskiptum bankans við Bandaríkin. Þeir hallast hins vegar að því að samþykkja ályktun þar sem segir að stjórnin hafi misst traust á Wolfowitz og vonast til að það leiði til þess að forstjórinn segi af sér. Reikna stjórnarmenn bankans með því, að slík yfirlýsing muni leiða til þess, að Bandaríkjastjórn sjái að sér og hætti stuðningi við Wolfowitz.

Wolfowitz hefur sagt, að hann hafi séð um að útvega Shaha Riza, vinkonu sinni, launahækkun og framgang í starfi samkvæmt ráðleggingum siðanefndar bankans. Robert Bennett, lögmaður Wolfowitz, vildi ekki upplýsa hvernig skjólstæðingur hans muni bregðast við þessari þróun mála.

Wolfowitz er að ljúka við skriflega greinargerð um sína hlið mála. Honum hefur verið boðið að koma á fund bankastjórnarinnar á þriðjudag og gert er ráð fyrir að vantraustsályktunin verði lögð fram skömmu síðar.