Ekkert hefur enn spurst til bresku stúlkunnar Madeleine McCann, sem hvarf frá sumarleyfisstaðnum Praia da Luz í Portúgal fyrir þremur vikum og segir frændi hennar fjölskylduna mjög vonsvikna vegna þess. Frændinn, John McCann, neitar því hins vegar að nokkuð sé til í sögusögnum um að foreldrar stúlkunnar séu mjög ósáttir við það hvernig staðið hefur verið að rannsókn málsins. Þetta kemur fram á fréttavef BBC.

Breska lögreglan hefur nú fengið sendar um 500 ljósmyndir frá fólki sem var á staðnum á þeim tíma sem stúlkan hvarf en bresk samtök sem berjast gegn kynferðislegu ofbeldi gegn börnum báðu nýlega almenning um að aðstoða við rannsókn málsins með því að senda inn ljósmyndir sem sýndu vegfarendur á staðnum.

Nýlega var haft eftir ónefndum heimildarmanni að foreldrar Madeleine Kate og Gerry McCann væru ósátt við ákveðin atriði í rannsókn málsins sem m.a. mætti rekja til þess að samkvæmt portúgölskum lögum má lögregla ekki upplýsa aðstandendur um smáatriði í rannsókna glæpamála.

„Við erum augljóslega mjög vonsvikin þar sem við höfum ekki fengið Madeleine aftur. Ég myndi ekki ganga svo langt að tala um ósætti en við erum vissulega vonsvikin,” segir John McCann. „Við vonum að lögregla muni kanna fleiri möguleika og rannsaka hvort hún hafi hugsanlega sést einhvers staðar og öðrum slíkum upplýsingum.”

Nokkuð hefur verið um að tilkynnt hafi verið að sést hafi til stúlkna sem þykja minna á Madeleine, m.a. í Marokkó. Þá eru foreldrar hennar nú sagðir vera að búa sig í ferð um Evrópu til að vekja athygli á leitinni að henni.