Fréttaþáttur á dönsku sjónvarpsstöðinni TV2, þar sem fjallað var um skaðsemi p-pillunnar Yasmin, veldur nú miklu fjaðrafoki þar í landi. Um er að ræða mest notuðu getnaðarvarnarpillu Danmerkur, en talið er að um 350.000 konur noti hana. Í þættinum var reynt að sýna fram á að Yasmin pillan væri skaðlegri en aðrar tegundir og hafi leitt tvær stúlkur til dauða af völdum blóðtappa. Læknar og aðrir sérfræðingar hafa staðfest þann grun, en lyfjaeftirlitið segir blóðtappa þekkta aukaverkun p-pilla og Yasmin sé þar engin undantekning. Þetta kemur fram á fréttavef Politiken í dag.

Hollenski prófessorinn Frits Rosendahl segir í þættinum að tölurnar sem komi þar fram séu athyglisverðar „Í fyrsta sinn liggja nú fyrir klínískar niðurstöður um fólk sem hefur orðið veikt, og það staðfestir grun okkar um það það gæti mögulega eitthvað verið að Yasmin.“ Yfirlæknir sjúkrahússins í Esbjerg er honum sammála. Þar hafi komið upp fleiri atvik þar sem konur sem taki inn Yasmin pilluna hafi verið lagðar inn vegna blóðtappa.

Á heimasíðu danska lyfjaeftirlitsins kemur fram að blóðtappi sé þekkt aukaverkun og Yasmin pillan valdi ekki oftar blóðtappa heldur en aðrar sambærilegar tegundir. Lyfjafyrirtækið Bayer-Schering, sem býr til Yasmin pilluna, vildi ekki taka þátt í gerð sjónvarpsþáttar TV2, en vísaði til þýskrar rannsóknar sem sýndi fram á að Yasmin valdi ekki oftar blóðtappa heldur en aðrar tegundir.

Tveir stjórnmálaflokkar, Kristlegir demókratar og Enhedslisten, hafa krafist þess að getnaðarvörnin verði tekin úr sölu þar til frekari rannsóknir hafa farið fram.

Yasmin pillan er ein algengasta getnaðarvarnarpillan á Íslandi. Hjá Lyfjaeftirlitinu fengust þær upplýsingar að hún sé notuð í um 20 prósent tilvika. Skráning á aukaverkunum lyfja á Íslandi er ekki mikil og því lítið vitað um það hversu algengar þær eru. Á heimasíðu Lyfju er blóðtappi ekki nefndur sem algeng aukaverkun Yasmin, en þar stendur að „reykingar auki hættuna á aukaverkunum, s.s. blóðtappa af völdum estrógena.“