Kardínálinn Renato Martino í Vatíkaninu lýsti því yfir í gær að kaþólikkar ættu að hætta stuðningi við Amnesty International. Ástæðan er ný stefna samtakanna um rétt kvenna til fóstureyðingar ef um nauðgun, sifjaspell eða heilsufarsvandamál væru um að ræða. Talsmaður Amnesty á Ítalíu harmar ummælin og telur þau geta skaðað fjáröflun samtakanna.

Kardínálinn sendi frá sér yfirlýsingu í gær þar sem hann sakaði Amnesty International um að snúa baki við hlutverki sínu sem væri að vernda mannréttindi. „Óhjákvæmileg afleiðing þessa ákvörðunar væri að kaþólskar stofnanir hætti fjárstuðningi við Amnesty sem og kaþólskir einstaklingar,"

Þess má geta að Bretinn Peter Benenson sem stofnaði Amnesty International árið 1961 var kaþólskur. En nú hefur myndast gjá á milli kaþólsku kirkjunnar og Amnesty sem breytti hlutleysi sínu um fóstureyðingar í apríl síðastliðnum. Talsmaður samtakanna á Ítalíu, Paolo Pobbiati, segir í breska dagblaðinu The Guardian í dag að Vatíkandið misskilji afstöðu samtakanna. „Við erum ekkert að fara að berjast fyrir lögleiðingu fóstureyðinga heldur að berjast gegn ofbeldi gegn konum. Sú barátta kom meðal annars til vegna reynslu okkar í Afríku þar sem konum er nauðgað af hermönnum sem neyða þær til að eignast börn þeirra."

Í samtali við The National Catholic Register, sagði Widney Brown, yfirmaður alþjóðalaga,stefnumála og herferða hjá Amnesty International, að umræða um nýja stefnu samtakanna varðandi fóstureyðingar hafi byrjað fyrir tveimur árum segir að samtökin tóku þátt í alþjóðlegri herferð gegn ofbeldi gegn konum. Í sömu grein segir kardináll Martino að kaþólska kirkjan kenni að það sé aldrei réttlætanlegt að drepa saklaust líf. Fóstureyðing sé morð.