Thomas Debrowski, aðstoðarforstjóri Mattel, staðfesti þetta í Peking og bað hann kínverska framleiðendur leikfanga afsölunar á því tjóni sem þetta hefur valdið á orðspori kínverskra leikfangaframleiðenda.

Mattel innkallaði yfir 20 milljónir leikfanga og í kjölfarið jókst þrýstingur á bandarísk stjórnvöld að setja hömlur á innflutning frá Kína til Bandaríkjanna.

Innköllun leikfanga sem framleidd eru í Kína hafði víðtæk áhrif á útflutning frá Kína þar sem ótti skapaðist um gæði á annarri vöru sem framleidd er í Kína, svo sem tannkrems og hjólbarða.

Þar til nú hafa undirverktakar Mattel í Kína þurft að sitja undir harðri gagnrýni um gæði þeirra leikfanga sem Mattel hefur innkallað. Meðal annars hefur því verið haldið fram að eiturefni sé að finna í málningu leikfanganna. Einhver fyrirtæki hafa misst samninga um framleiðslu leikfanga og Mattel hefur hert eftirlit með þeirri vöru sem framleidd er fyrir fyrirtækið í Asíu.

En í ljós er komið að stór hluti gallans er hönnunargalli hjá Mattel og hefur Thomas Debrowski nú lýst því yfir að Mattel beri fulla ábyrgð á þeim göllum sem fundist hafa í leikföngum frá fyrirtækinu.

„Mattel ber fulla ábyrgð á innkölluninni og biður ykkur kínversku þjóðina persónulega afsökunar og alla okkar viðskiptavini sem fengu leikföngin í hendur," sagði Debrowski við Li Changjiang, yfirmann gæðamála í Kína.

Sagði hann mikilvægt að allir gerðu sér grein fyrir því að meirihluti leikfanganna sem voru innkölluð voru gölluð í hönnun ekki vegna galla í framleiðslu í Kína, að því er fréttavefur BBC greinir frá.

Debrowski staðfesti að Mattel teldi að fyrirtækið hafi jafnvel gengið of langt í innköllun leikfanga þar sem einhver hluti þeirra hafi ekki brotið gegn þeim reglum sem gilda um gæðamál í Bandaríkjunum.

Li sagði að þessi skýring væri óásættanleg og að ekki væri hægt að innkalla tíu þúsund hluti einungis vegna mögulegs galla í einum. Hann sagði hins vegar að Kínverjar vildu áfram vinna fyrir Mattel fyrirtækið, en stór hluti hagnaðar Mattel verður til í Kína.