Mikhaíl Saakashvili, forseti Georgíu, segir að ásakanir á hendur honum um spillingu og morðsamsæri séu uppspuni frá rótum. Irakli Okruashvili, fyrrum varnarmálaráðherra Georgíu, sem hefur ásakað Saakashvili um spillingu, var handtekinn í vikunni og í gær stóðu  tugir þúsunda manna fyrir mótmælaaðgerðum utan við þinghúsið í Tbilisi til að mótmæla handtökunni. 

Saakashvili kom í dag frá New York þar sem hann hélt ræðu á allsherjarþingi Sameinuðu þjóðanna. Í sjónvarpsviðtali í dag sagði hann, að Okruashvili og allir aðrir vissu, að þær ásakanir, sem komið hefðu fram á hendur stjórnvöldum og honum sjálfum væru ófyrirgefanlegar lygar. Ítrekaði forsetinn, að hans megin stefnumál væri að berjast gegn spillingu.

Eftir að Okruashvili kom fram með ásakanirnar var hann handtekinn og ákærður fyrir spillingu. Saakashvili varði handtökuna og sagði, að hver sá sem bryti lög landsins ætti von á refsingu en stuðningsmenn Okruashvilis segja, að handtökunni sé ætlað að þagga niður í öflugum andstæðingi.

Fram kemur á fréttavef BBC, að í dag stofnuðu nokkrir stjórnarandstöðuflokkar í Georgíu bandalag með það að markmiði að knýja fram kosningar og koma Saakashvili frá en þeir saka forsetann um einræðistilburði.

Stjórnvöld í Georgíu segja, að mótmælaaðgerðirnar séu engin ógn vegna þess að friðsöm mótmæli séu eðlileg í lýðræðisríkjum.

Saakashvili komst til valda eftir Rósabyltinguna svonefndu, fjölmennar mótmælaaðgerðir sem leiddu til þess að stjórn Eduards  Shevardnadzes hrökklaðist frá völdum árið  2003.