Skipið Atlantic Osprey hélt í morgun úr höfninni í Studsvik, suður af Stokkhólmi, með kjarnorkuútgang áleiðis til endurvinnslustöðvarinnar í Sellafield á Englandi. Helen Bjørnøy, umhverfisráðherra Noregs, hefur að sögn norskra fjölmiðla skrifað starfssystrum sínum í Danmörku og á Íslandi og leitað stuðnings þeirra við að stöðva útflutning kjarnorkuúrgangs frá Svíþjóð til Sellafield.

Um borð í skipinu eru 4,8 tonn af kjarnorkuúrgangi og mun skipið sigla gegnum danska lögsögu á leiðinni til Sellafield. Í morgun var skipið undan Gotlandi en búist er við að það fari um Stórabelti eða Eyrarsund um helgina.

Ritzaufréttastofan hefur eftir Connie Hedegaard, umhverfisráðherra Dana, að sænski umhverfisráðherrann hafi hringt í sig í gær og fullyrt, að þetta yrði í síðasta skipti sem slíkur flutningur ætti sér stað. Um sé að ræða kjarnorkuúrgang frá sjötta og sjöunda áratug síðustu aldar en Svíar ráði ekki yfir tækni til að eyða honum.

Grænfriðungar hafa reynt að koma í veg fyrir að skipið gæti flutt úrganginn en skipið fór frá Studsvik í morgun eins og áður sagði.

Helen Bjørnøy hefur sent bréf til Þórunnar Sveinbjarnardóttur, umhverfisráðherra, og Connie Hedegaard og hvetur þær til að hafa samband við sænska umhverfisráðherrann vegna málsins. Bjørnøy segir í bréfinu, að það sé afar óheppilegt að Svíar skuli nú senda kjarnorkuúrgang til Sellafield og ganga þannig gegn norrænni samvinnu í samræmi við OSPAR-sáttmálann en Norðurlönd vilja að Sellafield kjarnorkuverið verði lagt niður.