Chavez krefst afsökunarbeiðni frá Spánarkonungi

Hugo Chavez, forseti Venesúela, krafðist þess í kvöld að Jóhann Karl, Spánarkonungur, bæði hann afsökunar á að hafa sagt honum að þegja á leiðtogafundi í Chile í síðustu viku. Spánarkonungur missti þolinmæðina þegar Chavez kallaði José María Aznar, fyrrverandi forsætisráðherra Spánar, fasista.

„Ég á að minnsta kosti rétt á því, að Spánarkonungur, sem er ekki konungur Latnesku Ameríku, biðjist með einhverjum hætti afsökunar á að hafa ráðist á mig með þessum hætti," sagði Chavez við ríkissjónvarpsstöðina VTV.

Chavez segist hvorki hafa séð né heyrt í konungi en Chavez átti í orðaskiptum við José Luis Rodríguez Zapatero, forsætisráðherra Spánar, á fundinum þegar þetta átti sér stað.

„Hefði ég heyrt í honum - hefði ég starað á hann eins og indíáni vegna þess að ég er indiáni og líka með svart og hvítt blóð," sagði Chavez.

Zapatero sagði í gær, að konungurinn hefði aðeins verið að verja hann á fundinum en Chavez greip ítrekað fram í ræðu Zapateros áður en Jóhann Karl sagði: „Hvers vegna heldur þú þér ekki saman?"

• 5 blogg um fréttina

Bloggað um fréttina

• Gunnar Freyr Rúnarsson: Hamagangur á hóli
• Snorri Bergz: Fasistinn þenur sig
• Friðrik Friðriksson: Hann ætti að passa sig á hyskinu frá Washington
• Björn Heiðdal: Hugo Chavez hin nýji Castró?
• Jóhannes Ragnarsson: Chavez er raunverulegt mikilmenni