Laura Bush, eiginkona forseta Bandaríkjanna, á fundi með Abdullah konungi Sádi-Arabíu í október. AP

Hillary Clinton, Barack Obama, Joe Biden og John Edwards hafa öll fordæmt dóminn og krafist þess að George W. Bush Bandaríkjaforseti fari fram á það við Abdullah konung Sádi-Arabíu að hann náði stúlkuna. „Ég hvet Bush forseta til að fara fram á það við Abdullah konung að hann ógildi dóminn og láti allar ákærur gegn stúlkunni niður falla,” sagði Clinton. “Sem forseti mun ég aftur gera mannréttindi að forgangsatriði í samskiptum Bandaríkjanna við umheiminn.

„Það var ósanngjarnt að fórnarlambið skyldi hljóta dóm og enn ósanngjarnara að refsingin skyldi vera tvöfölduð vegna tilrauna til að vekja athygli á dómnum ,” segir í bréfi sem Obama hefur skrifað Condoleezzu Rice, utanríkisráðherra Bandaríkjanna, vegna málsins.

Edwards hefur einnig sent frá sér yfirlýsingu vegna málsins þar sem hann segist yfir sig hneykslaður á því að Bush Bandaríkjaforseti hafi neitað að fordæma dóminn.

Stúlkunni, sem er nítján ára, var nauðgað eftir að hópur manna réðst á bíl hennar og samferðamanns hennar. Stúlkan var í síðustu viku dæmd til hálfs árs fangelsisvistar og til að þola tvöhundruð svipuhögg fyrir að vera á ferð með sér óskyldum manni. Hún hafði áður hlotið mildari dóm en hann var þyngdur í hæstarétti og segja heimildarmenn innan sádi-arabíska dómskerfisins að ástæða þess hafi fyrst og fremst verið sú að dómarinn hafi talið lögfræðing stúlkunnar reyna að reka málið í fjölmiðlum og að honum hafi mislíkað það.