Skemmtiferðaskipið MV Explorer, sem rakst á ísjaka í Suðurhöfum í gær, sökk í gærkvöldi en áður hafði 154 farþegum og áhöfn verið bjargað um borð í annað skip. Bengt Wiman, sænskur skipstjóri skemmtiferðaskipsins Explorer, segir að heyrst hafi brak frá miðri stjórnborðshlið skipsins og sjór hafi byrjað að fossa inn.

„Ég lét hringja neyðarhringingu og vekja alla farþegana og bað þá að klæða sig í hlý föt," hefur sænska fréttastofan TT eftir skipstjóranum. Hola á stærð við hnefa hafði komið á skipsskrokkinn við áreksturinn en gatið stækkaði og ljóst að ekki yrði hægt að halda skipinu á floti. Allir fóru í björgunarbáta og eftir sex tíma dvöl í kuldanum við Suðurskautslandið kom norska skemmtiferðaskipið MS Nordnorge þeim til bjargar. Fólkið var síðan flutt til King George eyjar, sem tilheyrir Chile. Engum mun hafa orðið meint af volkinu og í morgun var verið að gera ráðstafanir til að fljúga með farþegana til síns heima.

„Þegar ég kom loks í björgunarbátinn sátum við öll og hlýjuðum hvert öðru, farþegar og áhöfn," segir Wiman við TT.

Skipið var skoðað í Chile í mars og voru þá gerðar nokkrar athugasemdir, þ.á m. tvær sem viku að stjórntækjum þess.