Hakakross á hundi

Lögreglan í Þýskalandi rannsakar nú hvort 29 ára maður þar í landi hafi rakað hakakrossa í feldinn á hundi sínum, en hakakrossar og önnur nasismatákn eru bönnuð á opinberum vettvangi í Þýskalandi. Einnig fundust SS-merki í feldi hundsins.

Þegar lögreglan í bænum Straubing í Bæjaralandi kom til aðstoðar fyrrverandi unnustu hins grunaða, er hún vildi endurheimta eigur sínar úr íbúð hans af því að hún var hrædd við hann, kom í ljós að hundurinn bar þessi merki.

Ekki liggur fyrir hvort eigandi hundsins hafi farið með hann út úr íbúðinni eftir að hann rakaði merkin í feld hans, og því er ósannað að hann hafi sýnt þau á opinberum vettvangi. Verði það staðfest og maðurinn fundinn sekur gæti hann átt yfir höfði sér allt að þriggja ára fangelsi.

• 2 blogg um fréttina

Bloggað um fréttina

• Bara Steini: Heimakennsla 'I Sieg Heil Nasisma.
• Níels A. Ársælsson.: Hakakrossinn vinsælt tákn víða í heiminum