George W. Bush Bandaríkjaforseti hefur boðið Mahmoud Abbas, leiðtoga Palestínumanna, og Ehud Olmert, forsætisráðherra Ísraela, til opinberrar móttöku í Hvíta húsinu í dag til að lýsa því yfir formlega og fagna því að þeir hafi náð samkomulagi um að hefja friðarviðræður að nýju. Verur athöfnin fyrsta formlega athöfnin sem leiðtogar Ísraela og Palestínumanna taka þátt í í sjö ár. Þetta kemur fram á fréttavef Ha'aretz.<p>Til hafði staðið að Bush tæki á móti leiðtogunum hvorum í sínu lagi en þeim áformum hefur nú verið breytt. „Bush forseti hefur boðið þeim báðum til Hvíta hússins á morgun til að hefja samningaviðræður og þeir hafa fallist á að hittast að nýju 12. desember til að halda ferlinu áfram,” sagði Condoleezza Rice, utanríkisráðherra Bandaríkjanna í gærkvöldi.

George Bush Bandaríkjaforseti tilkynnti við upphaf ráðstefnu um málefni Miðausturlanda í Annapolis í Bandaríkjunum í gær að Mahmoud Abbas, leiðtogi  Palestínumanna, og Ehud Olmert, forsætisráðherra Ísraels, hefðu náð samkomulagi um að hefja friðarviðræður og að stefnt væri að því að komast að endanlegu friðarsamkomulagi fyrir lok næsta árs.

Viðræðurnar eiga að hefjast þann 12. desember næstkomandi og stendur til að fundað verði á tveggja vikna fresti eftir það. Þá lagði Sergei Lavrov, utanríkisráðherra Rússlands, til í gær að framhaldsráðsstefna ráðstefnunnar í Annapolis verði haldin í Moskvu næsta vor og lýsti Amr Moussa, framkvæmdastjóri Arababandalagsins, stuðningi við það.