Yfirvöld í Írak hafa farið fram á það við George W. Bush Bandaríkjaforseta að bandarísk herliðið í landinu framselji þrjá Íraka, sem dæmdir hafa verið til dauða, í hendur íraskra yfirvalda, til að hægt verði að fullnægja dómunum yfir þeim. Enn mannanna er hinn þekkti Efnavopna-Ali, frændi Saddams Husseins, fyrrum Íraksforseta, og náinn samstarfmaður hans. Þetta kemur fram á fréttavef Jyllands-Posten.

Bandarísk yfirvöld hafa enn ekki svarað beiðninni en háværar kröfur hafa að undanförnu komið fram um náðun Hashem sem súnnítar segja að hafi einungis fylgt skipunum Efnavopna-Alís.

„Bandaríkjamenn hafa ekkert umboð til að blanda sér í dómsmál og ákveða hvort dómurinn sé löglegur eða ekki. Einungis írösk yfirvöld hafa umboð til þess segir Ali al-Dabbagh, talsmaður Nouri al-Maliki, forsætisráðherra landsins.

Samkvæmt heimildum Reuters fréttastofunnar hefur Maliki,  sem er sjíti, farið fram á framsal mannanna, þannig að hægt verði að fullnægja dómnum.  Jalal Talabani, forseti landsins, sem er Kúrdi og  Tareq al-Hashemi, varaforseti sem er súnníti, segja Maliki hins vegar ekki hafa umboð til að krefjast framsals mannanna án samþykkis forseta landsins og tveggja varaforseta þess og hefur Hashemi jafnvel hótað að segja af sér verði þeir teknir af lífi án samþykkis forsetaráðsins.

Auk Ali Hassan al-Majeed, sem þekktir er undir nafninu Efnavopna Ali er um að ræða Sultan Hashem, fyrrum varnarmálaráðherra í stjórn Saddams Husseins fyrrum Íraksforseta  og Hussein Rashid Muhammad, yfirmann Íraska hersins í stjórnartíð hans. Þeir hafa allir verið fundnir sekir um stríðsglæpi gegn Kúrdum í norðurhéruðum Íraks.