Flokkur Pútíns fékk 62,8% atkvæða

Samkvæmt fyrstu tölum, sem birst hafa úr talningu atkvæða í þingkosningunum í Rússlandi í dag, fær Sameinað Rússland, flokkur Vladímírs Pútíns, forseta landsins, 62,8% atkvæða. Búið er að telja 12% atkvæða.

Samkvæmt tölunum, sem voru frá austasta hluta Rússlands, er útlit fyrir að fjórir flokkar fái yfir 7% atkvæða og komi því mönnum á þing. Kommúnistaflokkurinn var með 11,5% atkvæða, Frjálslyndi lýðræðisflokkurinn, sem er flokkur öfgaþjóðernissinnans Vladimírs Zhírinovskís, fékk 10,6% og flokkurinn Réttlátt Rússland 7,1%. Allir þessir flokkar studdu stjórnvöld í Kreml á síðasta kjörtímabili.

Verði úrslitin á þessa leið þýða þau, að enginn af frjálslyndu stjórnarandstöðuflokkunum koma mönnum á þing. Samkvæmt fyrstu tölum var kjörsókn rúmlega  60%

Litið hefur verið á kosningarnar sem einskonar þjóðaratkvæðagreiðslu um Pútín. Forsetakosningar verða í mars á næsta ári og þá er Pútín ekki kjörgengur þar sem hann hefur setið í embættinu í tvö kjörtímabil. Hann hefur hins vegar sagt, að fengi Sameinað Rússland góðan stuðning muni það veita honum „siðferðislegan styrk" til að halda um einhverja stjórnartauma áfram.

• 1 blogg um fréttina

Bloggað um fréttina

• Hilmar Guðmundsson: Rúsnesk