Demókratar gagnrýna Bush

Forsetaframbjóðendur demókrata gagnrýndu sameiginlega þá fullyrðingu George W. Bush Bandaríkjaforseta að „ekkert hafi breyst“ varðandi Íran, þrátt fyrir að ný skýrsla leyniþjónustustofnana Bandaríkjanna hafi sýnt fram á að Íranar hafi hætt við að þróa kjarnorkusprengju fyrir fjórum árum.

Sjö frambjóðendur hófu umræður í Iowa í dag með því að sammælast um að  Bandaríkin eigi að hætta að einblína á það að þau þurfi að kljást við Íran. Þess í stað eigi þau fremur að einbeita sér að diplómatískum samskiptum.

„Þessi forseti mun ekki láta staðreyndirnar standa í vegi fyrir sína hugmyndafræði,“ sagði öldungadeildaþingmaðurinn Barack Obama. „Þeir ættu að hætta þessu vopnaskaki og áttu í raun aldrei að byrja á því.“

Hillary Clinton sagði að Bush ætti að nýta þetta tækifæri sem nú hafi gefist. Hún bætti því hinsvegar við að það væri ljóst að sá þrýstingur sem verið hefur á Íran að undanförnu hafi haft áhrif. Joe Biden var því hinsvegar ekki sammála.

„Þeir hættu árið 2003,“ sagði hann og bætti við að Bush væri ekki treystandi.

• 1 blogg um fréttina

Bloggað um fréttina

• Pétur Björn Jónsson: Enn einn hlekkurinn í keðju skynsamlegra ákvarðana