Obama á mikilli siglingu

Samkvæmt nýjum skoðanakönnunum í New Hampshire í Bandaríkjunum er demókratinn Barack Obama með gott forskot á Hillary Clinton, helsta keppinaut sinn, í forkosningunum Demókrataflokksins fyrir komandi forsetakosningar.

Í nýrri skoðanakönnun CNN fær Obama 39% atkvæða, Clinton 29% og John Edwards fær 16%. Forkosningar í New Hampshire fara fram á morgun. Í könnun USA Today/Gallup er Obama með 13 prósentna forskot á Clinton.

Svo virðist sem að sigur Obama í Iowa í síðustu viku hafi eflt mjög baráttu hans fyrir forsetaembættinu.

Þegar horft er til repúblikana þá er sem John McCain sé með forskot á keppinauta sína í ríkinu. Hann fær 32% atkvæða sem er sex prósentum  meira en Mitt Romney, fyrrum ríkisstjóri Massachusetts. Mike Huckabee, fyrrum ríkisstjóri Arkansas, sem bar sigur úr býtum meðal repúblikana í Iowa, fær 14% atkvæða skv. skoðanakönnun CNN.

Barack Obama virðist vera stinga keppinauta sína af miðað við niðurstöður skoðanakannana. Reuters

• 1 blogg um fréttina

Bloggað um fréttina

• Reynir Jóhannesson: Bandarísk vika á Deiglan.com