Sonur bin Ladens vill dvalarleyfi á Englandi

Omar bin Laden, 26 ára gamall sonur hryðjuverkaleiðtogans Osama bin Ladens, hefur sótt um dvalarleyfi á Englandi en hann er kvæntur 52 ára gamalli breskri konu. Þau hjón áforma að setjast að í Moulton í Chelsea gangi allt að óskum.

Að sögn fréttavefjar blaðsins Daily Mail hefur Omar lagt fram umsókn í sendiráði Bretlands í Kaíró. Gert er ráð fyrir að dvalarleyfisumsóknin hljóti jákvæða afgreiðslu svo framarlega sem sýnt sé fram á, að hjónabandið sé löglegt og að Omar hafi áður fengið skilnað frá fyrri eiginkonu sinni.

Það vakti athygli á síðasta ári þegar Jane Felix-Browne skýrði frá því að hún hefði gifst syni bin Ladens.  Felix-Browne hefur verið gift fimm sinnum áður og á  þrjú börn og sex barnabörn.

Felix-Browne sagðist hafa hitt Omar bin Laden, einn af mörgum sonum Osama, þegar hún var í útreiðartúr nálægt píramídanum mikla í Giza í Egyptalandi. Hún var stödd þar í landi til að leita sér lækninga við MS sjúkdómnum.

Hún segir að þau Omar hafi gift sig í samræmi við íslamskan sið bæði í Sádi-Arabíu og Egyptalandi.

• 4 blogg um fréttina

Bloggað um fréttina

• Helga Guðrún Eiríksdóttir: Leist honum ekki á matarvenjur Ameríkana?
• Vilborg Traustadóttir: Lækning við MS leynist víða
• Björn Heiðdal: Íslenskur ríkisborgararéttur handa stráksa.
• Alfreð Símonarson: MEET THE NEOCONS, the MF. saga continues!