Omar bin Laden, sonur Osama bin Ladens, hefur gagnrýnt aðgerðir föður síns og hvatt hann til að leit annarra leiða til að berjast fyrir málstað íslam. Omar segist hafa ákveðið að koma fram í sviðsljósið til að reyna að binda enda á það ofbeldi sem aðgerðir föður hans hafi orsakað og til hreinsa nafn ættar sinnar. Þetta kemur fram á fréttavef CNN.

„Ég reyni að segja við föður minn: Leitaðu annarra leiða til að ná takmarki þínu. Þessi sprengja, þessi vopn erum engum til góðs,” segir hann í viðtali við CNN sjónvarpsstöðina. Hann segist þó ekki líta á föður sinn sem hryðjuverkamann og að það hafi yfirvöld á Vesturlöndum heldur ekki gert þegar hann barðist gegn her Sóvétríkjanna í Afganistan. „Þá var það kallað stríð, nú er það kallað hryðjuverk,” segir hann. „Hann trúir því að hann hafi verk að vinna, sem þjóni fólkinu. Ég lít ekki á föður minn sem hryðjuverkamann þar sem sagan sýnir að hann er það ekki.

Spurður um hryðjuverkaárásirnar í Bandaríkjunum árið 2001 segir hann: „Persónulega finnst mér það sem gerðist 11. september ekki hafa verið rétt en það gerðist. Mér finnst heldur ekki að Víetnam hafi verið rétt og mér finnst ekki það sem er að gerast í Palestínu rétt. Mér finnst ekki það sem er að gerast í Írak rétt.”

Omar segist ekki hafa hugmynd um hvar faðir hans dvelji nú en að hann sé þess fullviss að hann verði ekki handsamaður þar sem hann njóti stuðnings almennings á því svæði þar sem hann dvelji. Fólkið þar sé öðru vísi og að veraldleg yfirvöld skipti það engu máli.

Omar hafði áður veitt AP-fréttastofunni viðtal en neitaði þá að fordæma aðgerðir föður síns.  Hann var spurður að því í viðtalinu á CNN hvers vegna hann taki ekki harðari afstöðu til aðferða föður síns og segir það ekki vera í sínum verkahring. Það séu klerkar hans sem eigi að ráðleggja honum varðandi málefni íslam og að jafnvel þótt að Osama vildi breyta aðferðum al Qaeda samtakanna telji hann að hann hafi ekki vald til þess úr því sem komið sé.