Ísraelar segjast ætla að hefja eldsneytisflutning til Gaza á nýjan leik. Hálfur mánuður er liðinn frá því Ísraelar komu í veg fyrir flutninginn, en aðgerðirnar voru liður í að svara eldflaugaárásum palestínskra uppreisnarmanna.
Alls verða 2,2 milljónir lítra af eldsneyti flutt til Gaza, en það er lágmarkið svo hægt sé að keyra orkuverin á svæðinu. Ekki liggur fyrir hvenær flutningurinn hefst.
Ehud Olmert, forsætisráðherra Ísraels, átti jafnframt fund með Mahmoud Abbas, leiðtoga Palestínu, í dag og tjáði honum að Ísraelar muni gefa leyfi fyrir því að nauðsynjavörur verði fluttar til Gaza.
Leiðtogarnir ræddu ástandið á Gaza og þeir voru sammála um að það væri nauðsynlegt að koma íbúunum til aðstoðar sem fyrst.
Uppreisnarmenn úr röðum Hamas gerðu gat á landamæri Gaza við Egyptaland með þeim afleiðingum að hundruð þúsunda Gaza-búa hafa farið yfir landamærin í leit af vörum og nauðsynjum.
Stjórnvöld í Egyptalandi hafa óskað eftir viðræðum við uppreisnarmennina tafarlaust svo binda megi enda á neyðarástandið sem hefur skapast.