Verkalýðsleiðtogar handritshöfunda í Bandaríkjunum hafa tilkynnt meðlimum aðildarfélaga sinna að búið sé að komast að bráðabirgðasamkomulagi sem gæti bundið enda á þriggja mánaða verkfall.
„Þó að samkomulagið sé hvorki fullkomið og mæti ekki öllum okkar kröfum þá hefur verkfallið skilað góðum árangri," segir í tölvupósti sem meðlimir félags handritshöfunda fengu í dag.
Að sögn BBC mun deilan snúast að mestu leyti um greiðslur fyrir verk sem dreift er á netinu.
Stjórnir aðildarfélaganna munu funda í dag og ef þær ganga að samningnum gæti verkfallinu verið aflýst á morgun og Óskarsverðlaunaafhendingin gæti þá farið fram óhindrað.