Töluverð umræða fer nú fram um það í Bandaríkjunum hvers vegna eiginkonur stjórnmálamanna, sem orðið hafa uppvísir að kynlífshneykslum kjósi hvað eftir annað að standa með þeim og við hlið þeira er þeir koma sneyptir fyrir þjóðina til að biðjast afsökunar á framkomu sinni. Þetta kemur fram á fréttavef CNN.

„Af hverju mæta þær. Ég vil bara sjá einhverja þeirra -- Hillary, Sildu – standa á tröppum Hvíta hússins eða ríkisstjórabústaðarins, stappa niður fótunum og segja: Ég held húsinu.” segir bloggarinn Amy Ephron á huffingtonpost.com og vísar þar til Hollary Rodham Clinton, fyrrum forsetafrúar, og Sildu Spitzer, eiginkonu Eliot Spitzer ríkisstjóra New York.

„Við gerum það allar af persónulegum ástæðum,” segir Matos McGreevey, sem stóð með eiginmanni sínum Jim McGreevey ríkisstjóra í New Jersey er hann viðurkenndi samkynhneigð og ástarsamband við ungan aðstoðarmann.

McGreevey segist hafa endurlifað það andartak er hún kom fyrir alþjóð með manni sínum er hún sá myndir af Spitzer-hjónunum . „Ég gerði það vegna þess að hann var eiginmaður minn. Ég hafði alltaf stutt hann og ég elskaði hann. Ég átti dóttur og vildi að hún sæi að ég stæði með föður hennar,” segir hún en McGreevey hjónin eru nú að skilja.

Joanna Coles, ritstjóri kvennatímaritsins Marie Claire, tekur í sama streng og segir að í augnablikinu eigi Silda Spitzer í raun ekki annarra kosta völ en að standa með eiginmanni sínum. „Fólk er fljótt að dæma hana en svona eru hlutirnir þegar annar aðilinn hefir gefið feril sinn upp á bátinn til að styðja hinn,” segir hún.

„Mér hefði þótt mjög skrýtið hefði hún ekki verið þarna. Þetta er sá samningur sem þau hafa gert sín á milli. Hún valdi að gerast eiginkona ríkisstjóra og hún hefur sinnt því starfi af mikilli samviskusemi og mjög vel."

Silda Spitzer lærði lögfræði við Harvard háskóla og var á mun hærri launum en eiginmaður hennar er hún ákvað að hætta að vinna úti til að styðja hann og ala upp þrjár dætur þeirra. „Það var mjög flókið og tilfinningaþrungið þegar ég hætti að vinna,” sagði hún í viðtali sem birt var í tímaritinu Vogue á síðasta ári.

„Þetta var ekki það sem ég vildi gera en ég hef aldrei efast um að það hafi verið rétt ákvörðun fyrir okkur. Fólk vill ekki gefa drauma sína upp á bátinn en það  verður einnig að takast á við raunveruleika hversdagsins. Þegar öllu var á botninn hvolft þá skipti það mig mestu máli að fjölskyldulífið gengi upp.

Komið hefur fram í umræðu um málið í Bandaríkjunum að  Sildu Spitzer sé einstaklega vel liðin og að á samta tíma og Eliot Spitzer hafi verið mjög umdeildur stjórnmálamaður hafi varla nokkur maður sagt neikvætt orð um konu hans.