Ban Ki-Moon framkvæmdastjóri Sameinuðu þjóðanna fordæmdi árásir Ísraela á Gasa á leiðtogafundi íslamskra ríkja í Senegal í dag. Ki-Moon sagði árásirnar hafa bitnað á saklausum borgurum og að margir hafi látið lífið vegna óhóflegra aðgerða. Hvatti hann til tafarlauss vopnahlés.
Fram kemur á fréttavef BBC að ísraelskar herflugvélar gerðu árásir á norðurhluta Gasasvæðisins í dag eftir að Palestínumenn skutu eldflaugum yfir til Ísraels. Eldflaugunum var skotið eftir að ísraelskir sérsveitarmenn skutu fjóra palestínska hermenn til bana í Betlehem. Einn af þeim látnu var leiðtogi Jihad samtakanna á svæðinu.