Sextán ára gamall lettneskur piltur, sem var rænt er hann var ungabarn, mun væntanlega hitta móður sína fljótlega á ný. Þegar drengurinn var 1,5 mánaða skyldi móðir hans hann eftir út í vagni á meðan hún skaust inn í búð í borginni Daugavpils, sem er heldur minni en Reykjavík. Þegar hún kom út var barnavagninn horfinn og barnið.

Gerðist þetta árið 1992 og fór fram víðtæk leit en ekkert spurðist til drengsins. Var rannsókn málsins hætt fyrir sex árum síðan og var það ekki fyrr en nýverið að kona var handtekin í tengslum við allt annað mál að hvarf piltsins bar á góma á ný þar sem á heimili hennar bjó piltur sem engar upplýsingar var hægt að finna um, hvorki fæðingarvottorð né önnur skjöl um að hann væri sonur hennar. DNA rannsókn leiddi síðan í ljós að pilturinn var barnið sem var rænt árið 1992 í sömu borg og konan bjó í, Daugavpils. Íbúar Daugavpils eru 150 þúsund talsins og eru flestir þeirra af rússneskum uppruna.

Konan hefur hins vegar harðneitað að hafa rænt drengnum og heldur því fram að eiginmaður hennar, sem lést fyrir nokkrum árum, hafi komið með hann á heimilið og sagt að hann væri frá rússneska svæðinu Dagestan. 

Eftir að sannleikurinn kom í ljós var drengurinn settur á fósturheimili en dómari þarf að kveða upp úrskurð um hvort hann eigi að búa hjá líffræðilegri móður sinni. Barnaverndaryfirvöld segja að málið verði skoðað frá öllum hliðum og vilji drengsins hafður að leiðarljósi en hann verður sjálfráða við átján ára aldur. Pilturinn er eina barn líffræðilegu móðurinnar sem og konunnar sem ól hann upp. Hann hefur verið tekinn úr skóla og er í meðferð hjá sálfræðingi.