Kirkjan á svæði söfnuðarins í Texas. Íbúðarhús eru í bakgrunni. AP

Lögreglumenn sem leita nú á 700 hektara landi sértrúarsöfnuðar í vesturhluta Texas hafa m.a. fundið rúm í risastórri kalsteinskirkju sem saksóknarar telja að  hafi verið notað af körlum í söfnuðinum til samfara við eiginkonur undir lögaldri að lokinni hjónavígslu.

Greint var frá þessu í gær, þegar leitinni, sem staðið hefur í viku, var að ljúka. Yfirvöld hafa  tekið í sína vörslu 416 börn af svæðinu. 139 konur til viðbótar yfirgáfu svæði sjálfviljugar með börnunum.

Yfirvöld létu til skarar skríða gegn söfnuðinum fyrir viku eftir að 16 ára stúlka á svæðinu hringdi í fjölskylduathvarf og sagði að fimmtugur eiginmaður hennar hefði barið hana og nauðgað henni.

Samkvæmt dómsskjölum eru allmargar táningsstúlkur af svæðinu barnshafandi. Farið var með börnin á brott á þeim forsendum að yrðu þau áfram á svæði söfnuðarins væru hætta á að þau biðu „andlegan, líkamlegan og/eða kynferðislegan skaða.“

Leiðtogi söfnuðarins, Warren Jeffs, var hnepptur í fangelsi í fyrra eftir að hann var fundinn sekur um að hafa neytt 14 ára stúlku í söfnuðinum til að giftast frænda hennar.

Jeffs bíður nú réttarhalda í Arizona, þar sem hann er ákærður fyrir aðild að fjórum sifjaspellsmálum og kynferðislegri misnotkun á barni í tengslum við skipulögð hjónabönd.

Söfnuðurinn, sem kallast Bókstafstrúarkirkja Jesú Krists hinna síðari daga heilögu, klofnaði frá Mormónakirkjunni fyrir rúmri öld. Meginkenningarnar sem söfnuðurinn fylgir hljóða upp á að karlar verði að taka sér að minnsta kosti þrjár konur til að komast til himna, og að konur eigi að vera eiginmönnum sínum undirgefnar.

Breska blaðið Daily Mail segir, að lögregla sé nú að láta rannsaka DNA-sýni úr 416 börnum og 139 konum, sem fjarlægð voru úr byggingunni um helgina. Talið sé, að Warren Jeffs kunni að vera faðir margra barnanna en orðrómur er um að hann hafi átt 80 eiginkonur þegar hann stýrði söfnuðinum.

Lögregla fyrir utan kirkjuna. AP