Ný skoðanakönnun, sem Reutersfréttastofan hefur birt, gefur til kynna að forsetaframbjóðandi Repúblikanaflokksins í Bandaríkjunum, John McCain, standi jafnfætis Barack Obama sem enn berst við Hillary Clinton um hvort þeirra hljóti tilnefningu Demókrataflokksins sem forsetaefni. McCain hefur hins vegar forskot á Clinton á landsvísu.

Almenningur í Bandaríkjunum telur að McCain sé betri kostur en frambjóðendur demókrata þegar kemur að efnahagsmálum. McCain er þar með 3% meira fylgi en Obama og 5% meira fylgi en Clinton þegar spurt er sérstaklega um þetta.

Slagur demókratanna um hvor þeirra fái að mæta McCain í forsetakosningunum er enn í fullum gangi. Á landsvísu er Obama með 51% stuðning á móti 38% stuðningi hjá Clinton en búist er við Clinton sigri í Pensylvaníu 22. apríl nk. Svo virðist sem ummæli, sem Obama lét falla um verkalýð í ríkinu, hafi skaðað frambjóðandann en Obama sagði að verkafólk í Pennsylvaníu væri biturt vegna efnahagsástandsins og ekki væri undarlegt að það leitaði styrks í trúnni, byssum og fordómum gegn innflytjendum. 

„Obama stendur sig betur en Clinton í samanburði við McCain á landsvísu. En það er mjótt á mununum,“ sagði John Zogby skoðanakönnuður. „Obama og Clinton skaða framboð hvors annars því lengur sem þessi barátta heldur áfram. McCain lifir ljúfa lífinu bara á meðan.“

Á fréttavef Reuters kemur fram að skoðanakönnunin, sem sýnir að Obama sé með 13% meira fylgi á landsvísu, var að mestu gerð áður en ummæli hans um verkafólk í Pensylvaníu birtust í fjölmiðlum. Óvíst er ennþá hve mikil áhrif ummælin koma til með að hafa á fylgi hans á landsvísu.