Rannsóknarlögreglumenn í Portúgal rannsaka nú meinta tilraun til ráns á hollenskri stúlku en ræninginn er sagður samsvara lýsingu á manni sem sást á vettvangi er breska stúlkan Madeleine McCann hvarf í Portúgal fyrir ári. Þetta kemur fram á fréttavef Sky.

Hollenska stúlkan, sem er fimmtán ára, var ein á gangi í smáþorpinu Senhora da Rocha þegar hún var elt af manni í svörtum jeppa með skyggðum gluggum. Hann ók síðan bílnum í veg fyrir hana og reyndi fyrst að lokka hana inn í bílinn en síðan að draga hana inn. Henni tókst hins vegar að verjast manninum þar til annan bíl bar að og árásarmaðurinn lagði á flótta.

Rannsókn málsins var upphaflega í höndum lögreglu á staðnum en hefur nú verið falið sama rannsóknarlögregluteymi  og rannsakar hvarfið á Madeleine. Samkvæmt heimildum fréttastofu Sky hefur a.m.k. eitt svipað atvik komið upp á svæðinu á undanförnum mánuðum. Íbúar á svæðinu hafa hins vegar ekki fengist til að tjá sig um málið þar sem þeir óttast að það muni fæla ferðamenn frá svæðinu.

Lýsing stúlkunnar á manninum er í samræmi við lýsingar á manni sem Kate og Gerry McCann telja að hafi rænt dóttur þeirra Madeleine á sumarleyfisstaðnum Praia da Luz þann 3. maí á síðasta ári.