Mynd af heimasíðu Natöschu Kampusch.

Austuríska stúlkan Natascha Kampusch hefur lýst yfir vilja sínum til að aðstoða 42 ára konu sem haldið var fanginni í kjallara á heimili foreldra sinna í Austurríki í 24 ár. Segist hún bæði vilja veita henni fjárhagslegan og andlegan stuðning. Þetta kemur fram á fréttavef Jyllands-Posten.

„Þetta er skyndiákvörðun þó ég hafi að undanförnu fundið fyrir löngun til að vinna að málstað fólks sem er saknað eða horfið og fyrir fórnarlömb misnotkunar,” segir Kampusch. Þá gagnrýnir hún alla þá umfjöllun sem málið hefur fengið í fjölmiðlum og sagði hana gera fjölskyldunni enn erfiðara fyrir en ella.    

Konan, Elisabeth F. sem er 42 ára, var fangi föður síns og ól honum sjö börn á þeim árum sem hún var innilokuð í kjallaranum.  Eitt barnanna lést skömmu eftir fæðingu. Þrjú þeirra hafa alist upp hjá móður sinni í kjallaranum en þrjú hafa alist upp hjá afa sínum og ömmu í sama húsi. Hvorki þau né amma þeirra munu hafa vitað að móðir þeirra og systkini væru fangar í kjallara hússins.

„Það verður að taka það með í reikninginn að börnin eru alinn upp þarna. Þau munu eflaust eiga í erfiðleikum með að umgangast annað fólk. Peningar munu að sjálfsögðu auðvelda þeim lífið en þeir eru þó ekki mikilvægastir í þessu sambandi.”