Tugir þúsunda kjósenda hafa tekið þátt í prófkjörum bandaríska demókrataflokksins í Indiana og Norður-Karólínu í morgun. Prófkjörin þar eru síðustu stóru prófkjörin vegna forsetakosninganna í haust en kosið verður um 187 kjörmenn í prófkjörunum.

Obama hefur þegar tryggt sér fylgi 1745. kjörmanna en Clinton hefur tryggt sér fylgi 1608 kjörmanna. Fréttaskýrendur segja að hafi Obama sigur í báðum ríkjum í dag verði mjög erfitt fyrir ofurkjörmenn, sem geta ráðið úrslitum um það hvort Obama eða Clinton verður forsetaefni flokksins, að ganga framhjá honum.

Litlar líkur eru hins vegar taldar á sigri hans í Indiana og því hafa báðir frambjóðendur sagt líklegt að barátta þeirra muni standa fram yfir 3. júní er síðasta prófkjör flokksins fer fram.  

Obama hefur haft meira fylgi í Norður-Karólínu en Clinton samkvæmt skoðanakönnunum en fylgi hans þar hefur þó dalað töluvert að undanförnu.  

Obama kvaðst þó bjartsýnn í morgun. „Mér líður vel. Mér finnst við hafa unnið vel. Ég held að þetta verði tæpt en ég finni fyrir miklum stuðningi,” sagði hann.

 „Við verðum bara, þið vitið, að bíða og sjá hvað gerist,” sagði Clinton í morgun. „Við vonum auðvitað að hlutirnir fari á besta veg fyrir okkur.”