Heimili Fritzl fjölskyldunnar í Amstetten í Austurríki Reuters

Rosmary, eiginkona Josef Fritzl, sem hélt dóttur þeirra hjóna fanginni í 24 ár og eignaðist með henni sjö börn, verður yfirheyrð á ný af lögreglu til þess að ganga úr skugga um að hún hafi ekki vitað neitt um hryllinginn í kjallaranum. Þetta kemur fram á vef Times en Sunday Times birtir í dag viðtal við yfirmann rannsóknarinnar, Frank Polzer.

Jafnframt verður rannsókn haldið áfram í húsinu og beinist hún nú að efri hæðum þess þar sem Josef Fritzl bjó ásamt eiginkonu sinni á meðan Elisabeth dóttir þeirra var læst niðri í kjallaranum ásamt þremur börnum sínum.

„Við teljum að Fritzl hafi starfað einn en við getum ekki útilokað að einhver vissi hvað var í gangi í kjallaranum," segir Polzer í viðtalinu. 

Í síðustu viku hvatti Fritzl eiginkonu sína til þess að heimsækja sig í fangelsið en ekki er vitað hvort hún fari að þeirri ósk. Ekki eru allir trúaðir á orð hennar um að hún hafi ekki vitað neitt um hryllinginn í kjallaranum og að eiginmaður hennar hafi misþyrmt dóttur þeirra áratugum saman. 

Fritzl hélt Elisabethu,  sem er nú 42 ára, sem kynlífsþræl í hljóðeinangruðu og gluggalausu rými í kjallaranum. Henni var bjargað ásamt þremur börnum sem einnig var haldið í kjallaranum fyrir tveimur vikum. Þrjú önnur börn Elisabethar og Josefs voru alin upp af ömmu sinni og afa og pabba. En Josef sagði eignkonu sinni að þau hafi verið skilin eftir til ættleiðingar. Eitt barnanna lést skömmu eftir fæðingu og kom Josef  líkinu fyrir. 

Lögregla ætlar að spyrja Rosemarie, sem eignaðist sjö börn  með eiginmanninum, hvort hún hafi aðstoðað Fritzl við að útbúa dýflissuna og hvað hún hafi haldið að eiginmaðurinn væri alltaf að gera niðri í kjallaranum.