Frá borginni Mianyang í Sichuan-héraði í morgun AP

Herþyrlur varpa nú matvælum og lyfjum til þeirra sem eiga um sárt að binda í fjallaþorpum í Sichuan-héraði í Kína eftir jarðskjálftann sem reið yfir á mánudag. Samkvæmt opinberum tölum létust tæplega 15 þúsund manns í skjálftanum en líklegt þykir að sú tala eigi eftir að hækka enn frekar þar sem tugþúsunda er enn saknað.

Enn finnst fólk á lífi í rústum bygginga sem hrundu á mánudag en samkvæmt frétt Xinhua ríkisfréttastofunnar er ástandið verra en búist var við á sumum stöðum, til að mynda í bænum Yingxiu í Wenchuan-sýslu. Af tíu þúsund íbúum bæjarins voru einungis 2.300 á lífi er hjálparstarfsmenn komust þangað fyrr í dag og eitt þúsund þeirra eru alvarlega særðir.

Samkvæmt opinberum tölum eru 14.866 látnir en ekki er vitað hvort þeir 7.700 sem létust í Yingxiu séu inni í þeirri tölu. Í Sichuan héraði er talið að 25.788 hafi grafist í húsarústum og 14.051 er enn saknað. 

Ólíkt því sem áður hefur verið þegar náttúruhamfarir hafi riðið yfir Kína þá er fjallað ítarlega um hamfarirnar í kínverskum fjölmiðlum og útsendingar allan sólarhringinn þar sem greint er frá hjálparstarfi og ástandinu á hamfarasvæðunum, samkvæmt fréttamanni AP fréttastofunnar. Meðal annars hafa birst myndir af forsætisráðherra Kína, Wen Jiabao, þar sem hann tekur þátt í hjálparstarfinu með því að hvetja fólk til þess að þrauka og hughreystir börn sem hafa misst foreldra sína. Meðal annars  voru sýndar myndir af því er hann hughreysti þriggja ára gamla stúlku sem var grafin undir rústum heimili síns í rúmar 40 klukkustundir þegar tókst að bjarga henni. Hins vegar létust foreldrar hennar í jarðskjálftanum.