Forkosningar hjá bandaríska Demókrataflokknum fara fram í Oregon og Kentucky í dag. Ólíklegt verður að teljast að Hillary Clinton, sem sækist eftir útnefningu sem forsetaefni, nái að minnka bilið að ráði á milli sín og keppinautar hennar, öldungadeildarþingmannsins Barack Obama.

Talið er líklegt að Obama muni sigra í Oregon en Clinton í Kentucky. Obama hefur tryggt sér stuðning fleiri kjörinna fulltrúa og einnig er hann með stuðning fleiri ókjörinna fulltrúa og halda margir fram að keppninni sé lokið. Clinton heldur því enn fram að keppnin sé langt frá því að vera búin.

Innanbúðafólk Obama vill meina að nú þurfi hann að beina spjótum sínum að John McCain, sem væntanlega verður forsetaefni Repúblikanaflokksins. Að þeirra sögn hafa McCain og George W. Bush, forseti Bandaríkjanna, nú þegar sameinast um árásir á Obama og þeir vilja tryggja áframhaldandi setu repúblikana í forsetastólnum, að því er fram kemur á fréttavef BBC.