25 ára gamall karlmaður, sem ók vörubíl inn í mannfjölda í fjölförnu verslunarhverfi í Tókýó í gær og lagði síðan til vegfarenda með hnífi, lýsti áformum sínum á spjallrás á netinu. „Ég ætla að drepa fólk í Akihabara. Ég mun aka bílnum á fólk. Svo tek ég hnífinn fram. Verið þið öll sæl," segir í netfærslunni, sem birtist nokkrum klukkutímum áður en maðurinn lét til skarar skríða. 7 létu lífið og 12 særðust í árás mannsins.

Lögregla segir, að árásarmaðurinn, sem heitir Tomohiro Kato, hafi leigt vörubíl og ekið honum frá bænum Susano, sem er í um 100 km fjarlægð frá Tókýó. Þegar til höfuðborgarinnar var komið ók hann til Akihabara hverfisins þar sem fjöldi raftækjaverslana er. Hann ók síðan inn í göngugötu og stökk út úr bílnum og lagði til vegfarenda með stórum hnífi. Lögreglu tókst fljótlega að yfirbuga hann. 

Kato sagði lögreglunni, að hann væri orðinn þreyttur á lífinu  og vildi drepa fólk en aðrar ástæður gaf hann ekki upp fyrir árásinni. Að sögn japanskra fjölmiðla vann Kato í verksmiðju þar sem framleiddir eru bílahlutar. Hann var afar upptekinn af teiknimyndum og tölvuspilum. 

Málið hefur að vonum vakið mikinn óhug í Japan. Gatan þar sem maðurinn lét til skarar skríða var í morgun full af blómnum og sumir lögðu teiknimyndabækur á götuna.  Fjórtán ára gamall piltur sagðist hafa lagt kaffibolla á götuna því hann héldi að hinir látnu kynnu að vilja kaffi í morgunsárið.

Blóm og teiknimyndir á staðnum þar sem árásin var gerð. Reuters