Kinverskir bændur búa sig undir flóð úr Anxian lóninu í Sichuan í suðvesturhluta Kína. AP

Yfirborð Tangjiashan-lónsins sem myndaðist í jarðskjálftanum í Kína hefur haldið áfram að hækka þrátt fyrir að fráveituskurður hafi verið opnaður til að lækka yfirborð vatnsins. Samkvæmt heimildum Xinhua-fréttastofunnar er vatnsborðið nú tveimur metrum hærra en fráveituskurðurinn en unnið er að gerð annars skurðar frá vatninu. Þetta kemur fram á fréttavef BBC. 

Zhang Ting, yfirmaður jarðfræðistofnunar Sichuan héraðs, segir að  vatnsrennsli frá lóninu sé nú 25 kúbik á sekúndu en að vatnsrennsli inn í gíginn sé 4,6 sinnum meira.

Hermenn mynduðu fráveituskurðinn m.a. með því að sprengja kletta og losa um  leir og leðju með skriðdrekaskotum og vinna þeir nú að því að opna annan slíkan skurð.

Sérfræðingar hafa varað við því að gígurinn sem myndar lónið hljóti að bresta fyrr eða síðar en það myndi stofna heimilum allt að milljón manns á svæðinu í  hættu. Um 250.000 íbúar svæðisins hafa þegar verið fluttir frá heimilum sínum vegna flóðahættu frá því jarðskjálftinn varð þann 12. maí.  

Tangjiashan-vatn er stærst 30 lóna sem mynduðust við skjálftann.   Staðfest hefur verið að 69.136 hafi látið lífið í skjálftanum og er 17.686 enn saknað.