Lögregla á Ítalíu hefur greint frá því að upp hafi komist að 47 ára kona hafi verið fangi fjölskyldu sinnar í átján ár eftir að nágranni fjölskyldunnar lét lögreglu vita að grunsemdum sínum um að ekki væri allt með felldu á heimilinu. Hafði hún m.a. fundið einkennilega lykt en konan var lokuð inni í herbergi sínu sem var yfirfullt af sorpi. Þetta kemur fram á fréttavef Jyllands-Posten.

Konan er nú á geðsjúkrahúsi í Napólí. Hún var lokuð inni eftir að hún fæddi barn utan hjónabands og hefur drengurinn sem nú er sautján ára alist upp hjá fjarskyldum ættingjum. Hann mun ekki vita neitt um örlög móður sinnar.Birst hafa myndir af herbergi konunnar í ítölskum fjölmiðlum og má þar sjá lítið herbergi með rúmi, salerni og vaski.

Móðir konunnar, bróðir og systir búa einnig í húsinu en bróðir hennar er landbúnaðarverkamaður og systirin leikskólakennari. Þau eru öll í haldi lögreglu sökuð um frelsissviptingu.

Ekki er vitað hver faðir drengsins er.