Micheal Martin, utanríkisráðherra Íra, segir allt of snemmt að ætlast til þess að fundinn verði lausn á þeim vanda sem Evrópusambandið standi frammi fyrir eftir að Írar höfnuðu Lissabon-sáttmálanum í þjóðaratkvæðagreiðslu síðastliðinn fimmtudag. Þetta kemur fram á fréttavef BBC. „Það verður að virða ákvörðun þjóðarinnar og finna leið út úr þessu,” sagði hann. „Það er allt of snemmt að ætlast til að lausnir verði fundnar eða tillögur lagðar fram.” 

Utanríkisráðherrar Evrópusambandsríkjanna hittast á fundi í Luxemborg í dag þar sem málið verður rætt. „það væri áhættusamt að segja að við ætlum að endurlífga sáttmálann þar sem við stöndum frammi fyrir höfnun hans," sagði Dimitrij Rupel, utanríkisráðherra Slóveníu í morgun en Slóvenía fer nú með forystu innan framkvæmdastjórnar sambandsins. „Ég hef enga lausn. við munum hlusta á Martin utanríkisráðherra. Kannski hann hafi einhverja lausn. Við unum bíða og sjá og hugsa málið. Við þurfum að virða niðurstöðu atkvæðagreiðslunnar."  

Nokkrir af helstu ráðamönnum ESB landanna settu fram tillögur að viðbrögðum við niðurstöðunniúm helgina. Sögðu sumir Lissabon sáttmálann úr sögunni, þar sem kveðið er á um að hann taki fyrst gildi eftir að allar aðildarþjóðir ESB hafa fullgilt hann. Aðrir lögðu til að sambandinu yrði skipt upp í nokkurs konar A og B deildir þar sem Írar yrðu meðal B þjóða.  

Brian Cowen, forsætisráðherra Írlands, brást harkalega við slíkum hugmyndum í gær. Sagði hann ekki um einkavanda Íra að ræða og krafðist þess að tekið væri á málinu af samhug og samstöðu innan sambandsins.