Tugir ólátaseggja slógust við lögreglu í Búdapest, höfuðborg Ungverjalands, þegar gleðiganga fór um borgina í gær. Tveir lögregluþjónar meiddust í átökunum og 45 voru handteknir.

Ólátaseggirnir mótmæltu göngu samkynhneigðra um borgina og köstuðu eggjum, flöskum og grjóti í göngumenn. Þegar lögregla skarst í leikinn beindu þeir spjótum sínum að lögreglu og kveiktu meðal annars í lögreglubifreið.

Lögregla sprautaði vatni á ólátaseggina og beitti táragasi. Að sögn Katalin Levai, fulltrúi Ungverjalands á Evrópuþinginu, var rúða brotin í lögreglubifreið sem hún var í ásamt Gabor Szetey, fyrrum ráðherra, sem á síðasta ári varð fyrstur ungverskra ráðherra til þess að tilkynna opinberlega um að hann væri samkynhneigður.

Samkvæmt upplýsingum frá samtökum samkynhneigðra hefur að undanförnu verið ráðist ítrekað á félagsmenn þeirra. Meðal annars var bensínsprengju kastað inn á bar þar sem samkynhneigðir koma saman í borginni.

Mótmælendurnir eru flestir liðsmenn öfga þjóðernissinna sem segja samkynhneigð viðurstyggð og skömm og því þurfi þeir að hreinsa upp skítinn, svo þeirra eigin orð séu notuð.