Dómshúsið í St. Pölten í Austurríki. Reuters

Dóttir Josef Fritzl verður yfirheyrð af austurrískum yfirvöldum síðar í þessum mánuði. Fritzl hélt dóttur sinni fanginni í kjallara húss síns í 24 ár. Þá mun læknir reyna að komast að því hvernig eitt af þeim sjö börnum sem hún eignaðist með föður sínum lést.

Saksóknarinn í  St. Pölten í Austurríki, Gerhard Sedlacek, segir að yfirvöld vonist jafnframt til þess að gefin verði út formleg ákæra á hendur Fritzl innan fárra mánaða. Þá gætu réttarhöld yfir honum hafist fyrir lok þessa árs.

Fritzl hefur viðurkennt að hafa eignast sjö börn með dóttur sinni, Elisabeth. Þrjú börn bjuggu með móður sinni í kjallaranum í Amstetten og eitt þeirra lést skömmu eftir fæðingu. DNA-prófarnir hafa staðfest að hann er faðir barnanna sex sem eru á lífi.

Yfirvöld í Austurríki segja að Fritzl hafi játað að hafa kveikt í líki barnsins, en barnið er annað tvíbura sem fæddust árið 1997. Að sögn saksóknara gæti Fritzl verið ákærður fyrir morð ef það kemur í ljós að hann hafi átt þátt í dauða barnsins. 

Sedlacek segir að dómari muni yfirheyra Elisabeth en ekki er vitað hvar yfirheyrslan mun eiga sér stað. Yfirheyrslan verður send með aðstoð myndbandstækninnar til verjenda Fritzl, svo hún þurfi ekki að horfast í augu við föður sinn, þ.e. óski hún sérstaklega eftir því að hún vilji ekki hitta hann.