Saab JAS-Gripen orrustuþota. Mynd fengin hjá Saab

Maður hefur verið handtekinn í Svíþjóð grunaður um stórfelldar iðnaðarnjósnir gegn Saab sem og tilraunir til fjárkúgunar. Maðurinn var handtekinn í Gautaborg í gær og tóku sérsveitir sænsku ríkislögreglunnar þátt í handtökunni.

Maðurinn er grunaður um að hafa á ólöglegan hátt komist yfir skjöl sem varða rekstur Saab Microwave Systems en það fyrirtæki hannar meðal annars fjarskiptabúnað fyrir orrustuþotur.

Saab hefur unnið með leyniþjónustunni SÄPO og ákæruvaldinu við rannsókn þessa máls segir í Dagens Nyheter.

Samkvæmt Svenska Dagbladet var maðurinn ekki starfsmaður hjá Saab en ekki er vitað hvernig hann komst yfir þau skjöl sem hann reyndi að selja Saab fyrir háar upphæðir.

Málið mun hafa verið í rannsókn í hálft ár og ekki er talið ólíklegt að maðurinn hafi haft vitorðsmann innan fyrirtækisins. Fyrr í vikunni var kona handtekin grunuð um aðild að málinu en henni hefur nú verið sleppt.

 Handtakan mun hafa farið fram úti á götu í Gautaborg og var hún gerð af óeinkennisklæddum sérsveitarmönnum og fór fram án vandræða.