Varnarmálaráðherra Ítalíu, Ignazio La Russa, stingur upp á því í viðtali við ítalska dagblaðið Il Messaggero í dag að fingraför verði tekin af öllum Ítölum til þess að ríkisstjórn landsins verði ekki ásökuð um mismunum. Í lok júní tilkynnti innanríkisráðherra landsins að fingraför yrðu tekin af öllum sígaunum á Ítalíu.

La Russa segir í viðtalinu að nú á tímum sé nauðsynlegt að hafa upplýsingar um alla og því sé best að taka fingraför af öllum þeim sem dvelja í landinu. „Gerum það til þess að koma í veg fyrir ásakanir um misrétti... Með því verður mögulegt að taka fingraför af öllum sígaunabörnum," segir, La Russa, er einnig formaður bandalags þjóðernissinnaðra hægrimanna. 

Roberto Maroni, innanríkisráðherra, tilkynnti þann 26. júní að hann ætlaði að senda lögreglu inn í allar búðir í landinu þar sem flakkarar hafa aðsetur til þess að taka fingraför af þeim sem þar dvelja, fullorðnum sem börnum.

Evrópuþingið gagnrýnir ákvörðun ítalskra stjórnvalda

Þingmenn Evrópuþingsins sendu frá sér yfirlýsingu í gær þar sem þeir kröfðust þess að ítölsk stjórnvöld hættu við að taka fingraför af sígaunum. Vísa þeir í yfirlýsingunni til þess að það að taka fingraför af ákveðnum þjóðfélagshópi sé kynþáttamismunun.

La Russa segir í viðtalinu að krafa Evrópuþingsins hafi fengið hann til þess að hlægja. „Þeir hafa gert þetta að pólitískum ágreiningi í áróðursskyni án þess að hafa nokkurn áhuga á örlögum þessara barna," segir hann í viðtalinu. Segir hann að ákvörðun stjórnvalda sé tekin til þess að vernda börnin fyrir glæpum og að vera notuð.

Talið er að á milli 130-150 þúsund sígaunar búi á Ítalíu og eru þeir ítrekað ásakaðir um ýmsa glæpi. Þegar er byrjað að taka fingraför af sígaunum í Napólí og Mílanó.