Barack Obama, forsetaframbjóðandi bandarískra demókrata. AP

Mikill munur er á afstöðu Bandaríkjamanna til forsetaframbjóðenda demókrata og repúblíkana eftir kynþætti en forsetakosningarnar í vetur verða fyrstu forsetakosningarnar í Bandaríkjunum þar sem kosið verður á milli fulltrúa stóru flokkanna, sem ekki eru báðir hvítir. Þetta kemur fram á fréttavef Reuters.

Samkvæmt nýrri skoðanakönnun New York Times/CBS News er viðhorf  83% blökkumanna í Bandaríkjunum til Obama jákvætt en einungis 31% hvítra líta hann jákvæðum augum.Þá sýnir könnunin að 59% svartra telja samskipti kynþátta í Bandaríkjunum vera slæm. 34% hvítra líta hins vegar svo á.

Könnunin, sem byggir á símaviðtölum við 1.796 fullorðna einstaklinga, sýnir að 39% svartra telja engar raunverulegar framfarir hafa átt sér stað í samskiptum hvítra og svartra í landinu á síðustu árum. Einungis 17% hvítra líta hins vegar svo á.

Þá segjast  27% hvítra telja að of mikið hafi verið gert úr þeirri mismunun sem svartir Bandaríkjamenn búi við.

Önnur skoðanakönnun Washington Post-ABC News sýnir að Barack Obama, frambjóðandi demókrata, njóti nú stuðnings 50% skráðra kjósenda en John McCain, frambjóðandi repúblíkana, njóti stuðnings 42% skráðra kjósenda.