Gilad Shalit hefur nú verið í haldi Palestínumanna í tvö ár. AP

Ekki hefur náðst samkomulag um það á milli Ísraela og palestínsku Hamas-samtakanna að hefja samningaviðræður um lausn ísraelska hermannsins Gilad Shalit úr haldi samtakanna. Til hafði staðið að viðræður hæfust að nýju eftir að fangaskipti Ísraela og líbönsku Hizbollah-samtakanna hefðu átt sér stað. Þetta kemur fram á fréttavef Ha’aretz. 

Fréttaskýrendur Ha’aretz segja að svo virðist sem fangaskiptin hafi leitt til harðari afstöðu Hamas í málinu enda hafi þau sýnt hversu langt Ísraelar séu reiðubúnir til að ganga til að endurheimta hermenn sína, lífs eða liðna. Þá segir háttsettur ísraelskur embættismaður að svo virðist sem samtökin vilji halda Shalit sem tryggingu fyrir áframhaldandi yfirráðum sínum á Gasasvæðinu. 

Hamas samtökin hafa krafist lausnar hundruð palestínskra fanga úr fangelsum í Ísrael í skiptum fyrir Shalit en Ísraelar hafa fram til þessa einungis fallist á að sleppa 71 fanga í skiptum fyrir hann. Á lista Hamas samtakanna yfir fanga sem þeir vilja að látnir verði lausir í skiptum fyrir Shalit eru tugir manna sem hafa verið dæmdir fyrir fleiri en eitt morð og hryðjuverkaárásir. 

Segja Ísraelskir embættismenn að þótt greitt hafi verið hátt gjald fyrir líkamsleifar tveggja ísraelskra hermanna, sem voru í höndum Hizbollah, jafnist það ekki á nokkurn hátt á við kröfur Hamas-samtakanna.