Barack Obama, forsetaframbjóðandi demókrata í Bandaríkjunum, kom til Kabúl höfuðborgar Afganistan í morgun.  Obama er á ferð um Miðausturlönd og mun hann einnig heimsækja Írak, Jórdaníu og Ísrael, auk Evrópulanda. 

Obama mun eiga fund með Hamid Karzai, forseta Afganistan, og segja fréttaskýrendur að Obama sé líklegur til þess að ræða öryggismál,  að því er fram kemur á fréttavef BBC.

Obama er í sendinefnd frá Bandaríkjaþingi ásamt tveimur öðrum öldungadeildarþingmönnum. Að sögn talsmanns Bandaríkjahers í Afganistan komu þingmennirnir til flugvallar í Jalalabad í Nangarharhéraði og ræddu við hermenn.

Fyrr í vikunni sagði Obama að Bandaríkjamenn ættu að beina athygli sinni að Afganistan í stað Íraks. Aðspurður um hvaða skilaboð hann hefur til leiðtoga Afganistans og Íraks sagðist Obama hafa meiri áhuga á því að hlusta en tala.  „Ég fer þangað sem öldungadeildarþingmaður Bandaríkjanna.  Við erum með einn forseta í einu, það er hans verkefni að gefa slík skilaboð," sagði Obama áður en hann hélt til Kabúl. 

Fréttaskýrendur segja að kosningaskrifstofa John McCains, forsetaframbjóðanda repúblikana, muni fylgjast með hverju spori Obamas í ferðinni.