Barack Obama á fréttamannafundi í Amman í Jórdaníu í dag. Reuters

Barack Obama, forsetaframbjóðandi demókrata í Bandaríkjunum, heitir því að vinna að friðarsamkomulagi á milli Ísraela og Palestínumanna frá fyrsta degi verði hann kosinn í embætti Bandaríkjaforseta í haust.  Obama segist jafnframt telja að það kröfumikið verkefni, og að óraunsætt væri að halda að forseti Bandaríkjanna gæti smellt fingrum og komið á friði á milli þjóðanna. 

Obama lét þessi orð falla á fréttamannafundi í Amman í Jórdaníu í dag.  Obama er á ferðalagi í Miðausturlöndum og hefur m.a heimsótt Afganistan og Írak.  Búist er við að Obama fari til Ísraels í kvöld og svo til Palestínu.

„Ójafnvægi ríkir í ísraelsku ríkisstjórninni og Palestínumenn skiptast á milli stuðningsmanna Fatah og Hamas.  Það er erfitt fyrir báðar þjóðir að taka skref í áttina að friðarsamkomulagi," sagði Obama.

Ehud Olmert, forsætisráðherra Ísraels á yfir höfði sér ákæru fyrir spillingu, og gæti vikið úr embætti.  Mahmoud Abbas, forseti Palestínu, missti völd á Gasa svæðinu til Hamas liða fyrir ári síðan. 

Olmert og Abbas hófu friðarviðræður í nóvember, og hafa sett sér það markmið að komast að samkomulagi áður en George W. Bush, Bandaríkjaforseti, lætur af embætti í janúar 2009, að því er fram kemur á fréttavef Reuters.  Hins vegar hafa deilur um landsvæði og ofbeldisverk af hálfu beggja þjóða spillt fyrir því markmiði.