Að minnsta kosti 90 manns slösuðust eftir öflugan jarðskjálfta, sem reið yfir norður Japan í dag.  Upptök skjálftans, sem mældist 6,8 á Richter, voru á 120 kílómetra dýpi í Iwate héraði á Honshu eyju, og reið hann yfir rétt eftir miðnætti á staðartíma. 

Rafmagn fór af allt að 10.000 heimilum á Honshu eyju, að sögn yfirvalda.  Gluggar brotnuðu víða og var slökkvilið í borginni Hachinohe kallað út því sums staðar hafði kviknað í.  Opinber starfsmaður í Hachinohe segist aldrei hafa fundið slíkan titring á ævi sinni, en skjálftinn fannst einnig vel í Tókýó sem er í um 480 kílómetra fjarlægð. 

Skjálftinn í dag varð nærri upptökum kröftugs skjálfta sem varð 14. júní síðastliðinn og mældist 7,2 á Richter.  Að minnsta kosti 13 manns létu lífið og 10 er enn saknað eftir þann skjálfta.