Muammar Gaddafi, leiðtogi Líbýu, á óstýrilátan son. Reuters

Utanríkisráðuneyti Sviss hefur sent stjórnvöldum í Líbýu formleg mótmæli vegna refsiaðgerða, sem Líbýustjórn virðist hafa gripið til vegna þess að yngsti sonur Muammars Gaddafis, Líbýuforseta, var handtekinn nýlega í Sviss. 

Fram kemur á fréttavef BBC, að svissnesku fyrirtækjunum ABB og Neslé hafi verið skipað að loka skrifstofum sínum í Líbýu og svissneskt starfsfólk þar í landi hafi verið handtekið. Þá hafa Líbýumenn fækkað áætlunarflugum milli landanna, hætt að veita svissneskum ríkisborgurum vegabréfsáritanir til landsins og kallað sendiráðsstarfsmenn heim frá Sviss.

Þá hafa verið skipulagðar mótmælaaðgerðir utan við sendiráð Sviss í Trípólí og krefjast mótmælendur þess að hætt verði að senda olíu til Sviss og Líbýustjórn taki innstæður út úr svissneskum bönkum ef Sviss biðst ekki afsökunar á að hafa handtekið Hannibal Gaddafi.

Hannibal og eiginkona hans voru í haldi lögreglu í Genf í tvo sólarhringa um miðjan mánaðarins en kærur bárust á hendur þeim um að þau hefðu misþyrmt tveimur úr starfsliði þeirra þar sem þau dvöldu á lúxushóteli í borginni. Kona Hannibals er komin langt á leið. Þau hjón eiga yfir höfði sér ákæru fyrir líkamsárás og hótanir. Þau neita sök.

Sviss fær stóran hluta af þeirri hráolíu, sem landið flytur inn, frá Líbýu gegnum fyrirtæki sem Hannibal Gaddafi rekur. Á móti kemur að Líbýumenn eiga stóra olíuhreinsistöð í Sviss.

Utanríkisráðuneyti Sviss segist hafa sent sendinefnd til Líbýu til að útskýra málið og reyna að koma í veg fyrir harða milliríkjadeilu.

Hannibal, sem er 32 ára, hefur áður komið við sögu lögreglu í Evrópu en árið 2005 var hann fundinn sekur og dæmdur í Frakklandi fyrir líkamsárás á þáverandi unnustu sína.